யாழ்ப்பாண பல்கலைக்கழக விஞ்ஞானப் பீட புதுமுக மாணவன் மீதான பகிடிவதை எனும் தலைப்பில் 2025 மார்ச் (31) ஆம் திகதி, 2025 ஏப்ரல் (01)ஆம் திகதி பத்திரிகைகளில் செய்தி வெளிவந்தது.
இலங்கை மனித உரிமைகள் ஆணைக்குழுவின் பிராந்திய காரியாலயமானது 1996 ஆம் ஆண்டின் 21 ஆம் இலக்க மனித உரிமைகள் ஆணைக்குழுவின் சட்டபிரிவு 14 இன் பிரகாரம் ஆணைக்குழுவின் சொந்த பிரேரணை அடிப்படையில் கவனம் செலுத்தியுள்ளது என இலங்கை மனித உரிமைகள் ஆணைக்குழுவின் யாழ். பிராந்திய இணைப்பாளர் த.கனகராஜ் தெரிவித்துள்ளார்.
அவர் மேலும் தெரிவிக்கையில்,
1998 ஆம் ஆண்டின் 20ஆம் இலக்க கல்வி நிறுவனங்களில் பகிடிவதை “இலங்கையின் மிகக் கடுமையான குற்றங்களில் ஒன்றாகவும், பிணை வழங்கப்படாத குற்றமாகவும்” பிரகடனப்படுத்தியுள்ளது.
மேற்குறித்த பகிடிவதை சம்பவம் தொடர்பிலான அறிக்கையினை எதிர்வரும் 04.04.2025 இற்கு முன் இலங்கை மனித உரிமைகள் ஆணைக்குழுவின் யாழ்ப்பாண பிராந்திய காரியாலயத்துக்கு அனுப்பிவைக்குமாறு யாழ்ப்பாண பல்கலைக்கழக துணைவேந்தர், கோப்பாய் பொலிஸ் நிலைய பொறுப்பதிகாரி, யாழ்ப்பாண பிராந்திய பொலிஸ் அத்தியட்சகர் ஆகியோருக்கு கடிதம் அனுப்பிவைக்கப்பட்டுள்ளது என அவர் மேலும் தெரிவித்தார்.