மட்டக்களப்பு மாவட்டத்தில் கிளீனிங் ஸ்ரீலங்கா வேலைத்திட்டத்தின் ஊடாக பாடசாலை மாணவர்களின் சமூக ஆய்வு ஆற்றல்களை மேம்படுத்தல் தொடர்பான கலந்துரையாடல் மட்டக்களப்பு மாவட்ட அரசாங்க அதிபர் திருமதி ஜஸ்டினா முரளிதரன் தலைமையில் பழைய மாவட்ட செயலகத்தில் இன்று (01) இடம் பெற்றது.
கிழக்கு மாகாணத்தில் மட்டக்களப்பு மற்றும் அம்பாறை மாவட்டத்தில் சமூக ஆய்வு செயற்பாடுகள் தொடர்பாக இலங்கை மற்றும் ஜப்பான் நாட்டு அனுகுமுறையை ஒப்பிட்டு ஆய்வு முறை மேற்கொள்வதற்கு டோக்கியோ பல்கலைக்கழக பேராசிரியர் மிச்சிகோ ஸ்கிக் அவா அவர்கள் வருகை தந்து ஆய்வுகளை மேற்கொள்கின்றார்.
ஜப்பான் நாட்டில் பெற்றுக்கொள்ளப்பட்ட சமூக ஆய்வுகளை இலங்கையில் காணப்படும் சமூக ஆய்வு முறைகளை ஆய்வு செய்து பாடசாலை மாணவர்களின் ஆற்றல்களை மேம்படுத்துவதற்கு தேவையான நடவடிக்கைகள் மேற்கொள்ளப்படவுள்ளமை தொடர்பாக இதன் போது விரிவாக ஆராயப்பட்டது.
மாவட்டத்தின் 14 பிரதேச செயலாளர் பிரிவுகளில் கடமையாற்றும் உத்தியோகத்தர்களுடன் பேராசிரியர் கலந்துரையாடலை மேற்கொண்டதுடன் பாடசாலைகளில் உளவியலை மேம்படுத்துவதற்கு தேவையான விடயங்கள் தொடர்பாகவும் இதன் போது கவனம் செலுத்தப்பட்டது.
இந் நிகழ்வில் உதவி மாவட்ட செயலாளர் ஜி.பிரணவன், தென்கிழக்கு பல்கலைக்கழக சிரேஸ்ட விரிவுரையாளர் எம்.ஏ.எம் சமீன், உளவள துணை இணைப்பாளர் திருமதி சுபாநந்தினி உதயகாந்தன் உள்ளிட்ட மேலும் பல துறைசார் அதிகாரிகள் கலந்து கொண்டனர்.